Die Spreuke-31 Vrou in ’n moderne wêreld

Ek onthou hoe ek as jong meisie na Spreuke 31 gekyk het en gedink het: Dis die standaard. Die GOEIE Christenvrou. Die een wat nooit moeg word nie, nooit foute maak nie, en waarskynlik met ’n cappuccino in haar hand wakker word sonder enige melkvlekke op haar hemp.

En toe word ek groot. Die jongmeisie het ‘n vrou geword en besef dat die Spreuke-31-vrou nie ’n checklys-vrou is nie — sy is ’n uitnodiging.

Vir baie van ons voel Spreuke 31 soms soos ’n vreemde kombinasie van ’n Pinterest-bord, ’n besigheidsbestuurder, ’n superma, ’n entrepreneurskoningin en ’n huisvrou wat nooit ’n vetvlek op haar wit kombuis het nie. Maar kyk bietjie dieper.

Sy is nie perfek nie. Sy is gefokus.Sy is nie foutloos nie. Sy is gegrond.Sy is nie bonatuurlik nie. Sy is op God gerig.

Sy is ’n vrou wat opstaan — nie noodwendig vroeg nie, maar doelgerig.

Spreuke 31 sê sy staan “voor daglig op”, maar in moderne konteks beteken dit nie jy moet 04:30 CrossFit doen en ontbyt maak vir die gesin nie. Dit beteken bloot net sy leef nie reaktief nie, maar doelbewus. Dis die vrou wat opstaan in ’n seisoen van wanorde, babas, werk, stress, verandering — en steeds probeer. Nie perfek nie, maar teenwoordig.Sy is ondernemend — of sy ’n besigheid het of nie.

Die Spreuke-31-vrou koop grond, plant wingerde, maak produkte, verkoop dit, en werk met haar hande. In vandag se wêreld lyk dit soos:

• ’n vrou wat haar eie besigheid bou

• of ’n vrou wat uitstekende diens by haar werk lewer

• of ’n ma wat haar huis vreesloos bestuur

• of iemand wat haar kreatiwiteit gebruik om ander te dien

  
  

Daar is nie net een manier om ’n Spreuke-31-vrou te wees nie. God meet jou nie aan jou paycheck of jou Pinterest-vormige lewe nie — Hy meet jou aan jou trou, jou integriteit en jou hart.

Sy is sterk — maar nie die wêreld se definisie nie. Die Bybel sê: “Krag en waardigheid is haar kleding.” Dis nie gym-arms of ’n 12-stap skincare routine nie. Dit is die tipe krag wat sê: “Ek vertrou God meer as wat ek my omstandighede vertrou.”

Moderne krag lyk soms soos: om jou kinders se gebroke harte te versorg, om finansieel te probeer oorleef, om vir jou huwelik te bid wanneer dinge nie maklik is nie, om jou waardigheid te hou wanneer alles jou wil breek, om weer en weer op te staan

Sy praat met wysheid — nie perfeksie nie.

’n Spreuke-31-vrou hoef nie die slimste in die kamer te wees nie. Sy is net ’n vrou wat genoeg tyd met God spandeer het om te leer, moenie praat uit woede uit nie, Moenie antwoord vanuit wonde uit nie, moenie leef sonder wysheid nie.

En ja — sy maak foute. Maar sy erken dit, groei daarin en gebruik dit om ander te help.

Bo alles: Sy vrees die Here

Dít is die kern. Nie haar kookkuns, haar produktiwiteit, haar inkomste of haar skoon huis nie. Die laaste vers sê: “’n Vrou wat die Here vrees — sy moet geprys word.”

Dit beteken, sy ken God, sy vertrou Hom en sy leef vanuit ’n plek van eerbied, afhanklikheid en liefde. Die Spreuke-31-vrou is nie ’n vrou wat alles reg kry nie — sy is ’n vrou wat alles aan God gee.

’n Moderne Spreuke-31-vrou kan so lyk:

Sy sit in die motor en bid terwyl sy wag vir skooluitklok.Sy stuur ’n WhatsApp van bemoediging vir ’n vriendin wat swaar kry.Sy bou ’n besigheid uit niks uit.Sy probeer ’n gebalanseerde lewe leef, al voel sy konstant op die randjie.Sy huil in die stort, maak haar gesig droog en probeer weer.Sy hou vas aan God wanneer sy self voel sy gly.

Dis nie glamorous nie. Dis nie Instagram-waardig nie. Maar dis heilig. Die waarheid?

God het nie ’n perfékte vrou in gedagte toe Hy Spreuke 31 laat skryf het nie.Hy het ’n getroue vrou in gedagte.

’n Vrou wat Hom eerste sit.’n Vrou wat haar gesin dien uit liefde, nie uit skuld nie.’n Vrou wat haar roeping uitleef in die seisoen waar sy is.’n Vrou wat sterk is omdat sy geanker is.’n Vrou wat sag is omdat sy veilig is.’n Vrou wat stap — nie omdat sy alles verstaan nie, maar omdat sy weet Wie saam met haar stap.